काठमाडौं । ग्रेटर नेपालका संस्थापक फणीन्द्र नेपाल पक्राउ परेका छन् । सामाजिक सञ्जाल फेसबुकमा एक स्टाटस लेखेर सिंहदरबार दक्षिणी गेटमा धर्ना बस्न पुगेका उनलाई नेपाल प्रहरीले पक्राउ गरेको हो ।
पछिल्लो समय भारत र चीनले नेपालको अनुमतिबिना नै लिपुलेक प्रयोग गर्ने सहमति गरेको तर त्यस विषयमा सरकार गैरजिम्मेवार र मौन रहेको भन्दै उनी आन्दोलनरत छन् । सोही क्रममा सिंहदरबार गेट अघि धर्ना बसेर सरकारको विरोध गर्न पुगेका उनी पक्राउ परेका हुन् । प्रहरीले उनलाई सिंहदरबार प्रहरी वृत्त पुर्याएको छ ।
‘सरकार लिपुलेक कहिले फिर्ता गर्ने ?’ लेखिएको ब्यानर बोकेर सिंहदरबार परिसर पुगेका उनले सोमबार दिउँसो १२ बजेदेखि २ बजेसम्म एक्लै धर्ना बस्ने जनाएका थिए ।
पक्राउ पर्नुअघि नेपालले लेखेको फेसबुक स्टाटस यस्तो छः
लिपुलेकको नेपाली सार्वभौमसत्तामाथि इन्डियाली ज्यादती देखेर पनि केही नभएजस्तो गर्ने र चीन र इन्डियाले लिपुलेक प्रयोग गर्ने सहमति गर्दा त्यो चीन र इन्डियाबीचको प्राविधिक कुरा हो भन्ने गैरजिम्मेवार अभिव्यक्ति दिने सरकारको विरोध नगर्ने हो भने सरकार झन् झन् मौन रहनेछ , इन्डियाको दास बन्दै जानेछ र नेपाली भूमिको रक्षा गर्न थप असमर्थ हुनेछ । त्यसैले सरकारलाई राष्ट्रियताका पक्षमा बोल्न बाध्य पार्न पनि नागरिक तहबाट सरकारको विरोध नगरी हुँदैन । यही प्रयोजनका निम्ति ग्रेटर नेपाल राष्ट्रवादी मोर्चा आज मध्यान्ह १२ः०० बजेदेखि ४ः०० बजेसम्म सिंहदरबारको दक्षिणी ढोकामा धर्नामा बस्दै छ ।
