काठमाडौँ । प्रेस चौतारी नेपालका अध्यक्ष गणेश बस्नेतलाई प्रहरीले असफल पक्राउ प्रयास गरेको छ। बिहीबार काठमाडौँकाे हार्दिक हाेटलमा भइरहेकाे एक कार्यक्रममा सहभागी भइरहेका बस्नेतलाई सादा पोशाकका प्रहरीले पक्राउको प्रयास गरेका हुन् ।
प्रहरीको साइबर ब्युरोबाट खटिएको टोलीले बस्नेतलाई पक्राउ प्रयास गरेको हो। तर, कार्यक्रममा रहेको एमाले सम्बद्ध पत्रकारहरूको प्रतिरोधका कारण प्रहरी बस्नेतलाई पक्राउ नगरी फर्किएको छ ।
बस्नेत सत्ताको नेतृत्व गरिरहेको नेकपा एमालेका पत्रकारहरूको संस्था प्रेस चौतारीको अध्यक्ष हुन् । बस्नेतले सञ्चालन गर्ने जनता टाइम्स डटकममा प्रकाशित समाचारकै कारणले उनलाई पक्राउ गर्न खोजिएको प्रहरीले स्राेतले बताएकाे छ। बस्नेत विरुद्ध पक्राउ पुर्जी भने जारी भइसकेको छ ।
यसैबीच नेपाल पत्रकार महासङ्घले बस्नेत पक्राउ प्रयासको विरोध जनाएको छ । बिहीबार एक विज्ञप्ति जारी गर्दै महासङ्घले प्रेस काउन्सिलको क्षेत्राधिकार नाघेर प्रहरीले अध्यक्ष बस्नेतमाथि धरपकड गर्न गरेको प्रयासको विरोध जनाएको हो ।
