काठमाडौँ । काठमाडौँको प्रमुख स्थान सुन्धारा–रत्नपार्क–भद्रकाली–पुतलीसडक लगायतका क्षेत्रको ट्राफिक अवस्था अस्तव्यस्त बनेको छ । सहकारी पीडितर निर्मला कुर्मीको न्यायको लागि आन्दोलन गरिरहेको समुहले मार्च पास र अन्य विविध कारणले जाम बढेको हो ।
निर्मला कुर्मीका हत्याका अभियुक्त बादशाह कुर्मीलाई मन्त्री पदमा नियुक्त गरेको भन्दै विरोधमा माइतिघरदेखि बालुवाटारसम्म पैदल यात्रा गरिएको थियो । उक्त पैदल मार्चको आयोजना महिला अधिकार मञ्च, महिला सुरक्षा दवाब समूह, नेपाल मुस्लिम महिला कल्याण समाज, महिला मानव अधिकार रक्षक सञ्जाल, महिला अधिकारका लागि राष्ट्रिय अभियान, महिला विश्वास संघ, साप नेपाल, जागर नेपाल, मिलीजुली समाज, मितिनी नेपाल, ल्याक, युथ एडबोकेसी नेपाल र एबीसी नेपालले संयुक्त रुपमा गरेको हो । सो पैदल मार्चलाई बृहत नागरिक आन्दोलनले ऐक्यबद्धता जनाएको छ ।
त्यस्तै सहकारीमा बचत गरेको रकम फिर्ता हुनुपर्ने माग राख्दै बिभिन्न सहकारी पीडितहरुले प्रदर्शन गरेका थिए । उनीहरु सिंहदरबार भित्र प्रवेश गर्ने भन्दै शान्तिबाटीका बाट अघि बढेका थिए । सो क्रममा प्रहरीले उनीहरुलाई भद्रकालीमै रोकेको हो । प्रदर्शनकारीहरुले निषेधित क्षेत्र तोड्न खोजेपछि प्रहरीले लाठी चार्ज गरेको थियो । राजधानीको अतिव्यस्त स्थानमा भएका प्रदर्शनका कारण सुन्धारा–रत्नपार्क–भद्रकाली–पुतलीसडक आसपासका सडकमा चर्को जाम भएको छ ।
