काठमाडाैँ । टलिउडका सुपरस्टार अल्लु अर्जुन पक्राउ परेका छन् । गत डिसेम्बर ४ मा ‘पुष्पा २ : द रुल’ को प्रिमियरमा क्रममा भएको भागदौड प्रकरणलाई लिएर हैदरावाद प्रहरीले उनलाई पक्राउ गरेको हो ।
विभिन्न भारतिय सञ्चारमाध्यमका अनुसार गत डिसेम्बर ४ मा फिल्मको प्रदर्शनका क्रममा थिएटरमा भागदौड मच्चिँदा ३५ वर्षीया महिलाको मृत्यु भएको थियो । यस घटनामा प्रहरीले अल्लु अर्जुन र थिएटर व्यवस्थापनविरुद्ध मुद्दा दर्ता गरेको थियो । सोही प्रकरणमा शुक्रबार अल्लु अर्जुन पक्राउ परेका हुन् ।
‘पुष्पा २ : द रुल’ले विश्वभरका थिएटरमा धुम मच्याइरहँदा प्रहरीले उनलाई पक्राउ गरेको हो । पक्राउ परेका अर्जुनलाई हैदराबादको चिक्कडपल्ली प्रहरी चौकीमा लगिएको छ ।
डिसेम्बर ४ मा ती महिलाको मृत्यु भएपछि अल्लु अर्जुन र उनको टोलीले महिलाको मृत्युमा शोक व्यक्त गरेका थिए। त्यस्तै उनीहरुले मृतकको परिवारले भेटेर २५ लाख रुपैयाँ दिने घोषणासमेत गरेका थिए ।
