काठमाडौँ । राष्ट्रिय स्वतन्त्र पार्टीले उद्योगहरुमा विजुली जोड्न अनुमति दिएजस्तै गरी महसुल उठाउन निर्देशन दिन आग्रह गरेका छन् । प्रतिनिधिसभाको आकस्मिक समयमा बोल्दै रास्वपा सांसद हरि ढकालले उक्त माग गरेका हुन् ।
‘समितिमा ब्यापक छलफल गरिएको छ । तिर्नपर्नी उद्योगीहरुले तिर्न पर्दैन भन्या नी छैन । म सम्माननीय प्रधानमन्त्री ज्यूलाई भन्न चाहन्छु, जसरी विजुलीको लाइन जोड्न निर्देशन दिनुभएको थियो, महसुल उठाउनको लागि उसैगरी निर्देशन दिनुपर्यो’, उनले भने, ‘मिटर जडान गरिएको ठाउँको महसुल उठाउन यो हालत छ यो देशमा, मिटर नभाका भन्सार हेरौँ त । मालपोत हेरौँ त के छ हालत ?’
उनले विद्युत महसुलबारे बोल्ने क्रममा सभामुखले माइक काटिदिएका थिए । विद्युत् महसुलका विषयमा बोलिरहँदा माइकको लाइन काटिएपछि उनले आफ्ना भनाइ राख्न पाउनुपर्ने माग गरेका थिए ।
राष्ट्रिय स्वतन्त्र पार्टीका अध्यक्ष रवि लामिछानेले विद्युत् महसुलको विषयमा बोल्दाबोल्दै माइक काटिएको हुनाले समय तोकेर सांसद ढकाललाई बोल्न दिनुपर्ने माग गरेका थिए ।
त्यस्तै राप्रपा अध्यक्ष राजेन्द्र लिङ्देनले प्रतिनिधिसभा सदस्यलाई तिमीले यो मात्र बोल्न पाउँछौ, पहिले यहाँ लेखाएर मात्रै बोल्न पाउँछौ भन्ने व्यवस्था मान्य नहुने बताए । लामो समयको अवरोधपछि मात्र सभामुखले सांसद हरि ढकाललाई बोल्न समय दिएका थिए ।
