काठमाडौँ । पाँच दिनदेखि ‘गुणस्तरीय शिक्षाको आधार, ईसीडी शिक्षामा सुधार’ भन्ने नारा बोकेर माइतीघरमा एक्लै प्रदर्शन गर्दै आएका नेपाल समाजवादी विद्यार्थी युनियनका अध्यक्ष नेत्र चापागाईंलाई शिक्षामन्त्री सुमना श्रेष्ठले प्रदर्शनस्थलमै पुगेर भेटेकी छन् ।
चापागाईंले प्रारम्भिक बाल विकास (ईसीडी) तहलाई तीन तहको बनाउनुपर्ने, तालिमप्राप्त दक्ष शिक्षक राख्नुपर्ने, दिवा खाजाको रकम बढाउनुपर्ने लगायतका पाँच बुँदे माग राख्दै आएका छन् । भेटमा शिक्षामन्त्री श्रेष्ठले चापागाईँले राखेका माग महत्त्वपूर्ण र साझा विषय भएकाले मन्त्रालयको ध्यानाकर्षण भएको बताएकी थिइन् ।
साथै चापागाईँले उठाएका केही विषय यस वर्षको निती तथा कार्यक्रममै समेटिएको समेत बताइन् । साथै कतिपय माग भने शिक्षा मन्त्रालयले अर्थ मन्त्रालय सहित अन्य निकायसँग समन्वय गर्नुपर्ने भएकाले छलफल गर्ने बताइन् ।
