काठमाडौँ । सर्वोच्च अदालतले राष्ट्रिय स्वतन्त्र पार्टी (रास्वपा)का नेताहरुलाई मुद्दा हाल्ने अधिवक्तालाई नै स्पष्टिकरण सोधेको छ । सर्वोच्चका न्यायाधीशद्वय मनोजकुमार शर्मा र नृपध्वज निरौलाको इजलासमा प्रारम्भिक सुनुवाइपछि थप प्रमाण पेश गर्न निवेदकलाई आदेश दिइएको हो ।
सर्वोच्च प्रशासनका अनुसार अदालतको अवहेलना भयो भन्ने पर्याप्त आधार र कारण नखुलेपछि निवदेकसँगै स्पष्टीकरण माग्ने आदेश भएको हो ।
राष्ट्रिय स्वतन्त्र पार्टीका नेताहरुले रास्वपा सभापति रवि लामिछानेविरुद्धको मुद्दामा अदालती कारबाहीविरुद्ध आन्दोलन गरी न्याय प्रक्रियामा अवरोध गर्न खोजेको भन्दै सर्वोच्चमा अवहेलना मुद्दा दायर भएको थियो । अधिवक्ता अनुपम भट्टराईले रास्वपाका उपसभापति एवं सांसद डा. स्वर्णिम वाग्ले, प्रवक्ता मनिष झा, सुमना श्रेष्ठ, विराजभक्त श्रेष्ठ, डा. तोसिमा कार्की, सोविता गौतम, सन्तोष परियार लगायत नेताहरुविरुद्ध अदालतको अवहेलना मुद्दा दर्ता गरेका थिए ।
भट्टराईले हालेको रिट कात्तिक १४ गते सर्वोच्च प्रशासन दर्ता अस्वीकार गर्दै दरपिठ गरेको थियो । त्यसपछि भट्टराईले इजलासमा निवेदन दिएपछि अदालतले दरपिठ बदर गरी मुद्दा दायर गरेको थियो ।
