बागलुङ । बागलुङको ढोरपाटन स्याउ खेतीका लागि उपयुक्त मानिन्छ तर यहाँका किसानले व्यवस्थित रुपमा खेती नगर्दा राम्रो उत्पादन हुन सकेको थिएन । ढोरपाटनको हावापानी र मौसममा विभिन्न जातका स्याउ उत्पादन गर्न सकिने भएपछि प्रधानमन्त्री कृषि आधुनिकीकरण परियोजना इकाई बागलुङले किसानलाई आधुनिक प्रबिधिको प्रयोग स्याउ खेतीमा आकर्षित गर्न थालेको छ । ढोरपाटन नगरपालिका–९ नवी गाउँमा परम्परागत रुपमा खेती गरिदै आएको स्याउले राम्रो उत्पादन नदिएपछि गत वर्षदेखि आधुनिक प्रबिधिको प्रयोग गरि खेती गर्न थालिएको हो ।
आर्थिक वर्ष २०८०/०८१ मा नवी गाउँको २८० रोपनी जमिन चक्लाबन्दी गरि स्याउ लगाइए छ । मुस्ताङको मार्फादेखि चार हजार २०० विरुवा लिएर लगाएको हो । प्रधानमन्त्री कृषि आधुनिकीकरण परियोजनाको १७ लाख अनुदान र किसानको नौ लाख लगानीमा स्याउ खेती गरिएको हो । यस गाउँमा रेड डेलिसियस, गोल्डेन डेलिसियस, रोयल डेलिसियस जातका स्याउका विरुवा लगाएको छ । नवी गाउँको तल्लो बिजउले कृषक समूह र नवी प्रगतिशील कृषक समूहमार्फत किसानलाई जोडेर स्याउ खेती थालिएको हो ।
यस क्षेत्रमा किसानले झण्डै दुई दशक अगाडिदेखि स्याउ खेती गर्दै आए पनि राम्रो लाभ भने लिन नसकेका थिएनन् । प्रधानमन्त्री कृषि आधुनिकीकरण परियोजनाले ठूलो लगानी गरेर गाउँमा स्याउ खेती गर्न प्रेरित गर्दा किसान उत्साहित छन् । ढोरपाटन आलु र स्याउका लागि प्रख्यात मानिदै आए पनि किसानमाहरुमा प्राबिधिक ज्ञान नहुँदा उत्पादन बढाउन नसकेका थिएनन् । लगाइएको स्याउका विरुवाले चार वर्षमा उत्पादन दिने भएपछि किसान पनि खुसी भएका छन् ।्
हरेक वर्ष ढोरपाटनमा हजारौँको संख्यामा पर्यटक पुग्ने गर्छन् । तर उनीहरुले कोसेलीका रुपमा स्याउ भने लैजान पाएका छैनन् । अब स्याउ खेतीबाट किसानले राम्रो आम्दानी लिन सक्ने अपेक्षा लिएका छन् ।
