काठमाडौँ । सर्लाहीको बरथहवामा प्रहरीको गोली लागेर मृत्यु भएका जयशंकर साहको परिवारलाई सरकारले १० लाख रुपैयाँ दिने भएको छ । शनिबार गृह मन्त्रालयलले विज्ञप्ती निकाल्दै सो जानकारी गराएको हो ।
त्यसैगरी सो घटनाबारे छानबिन गर्न तीन सदस्यीय छानबिन समिति पनि बनाइएको छ । गृहले सहसचिव थानेश्वर गौतमको संयोजकत्वमा समिति गठन गरेको हो । उक्त समितिमा नेपाल प्रहरीका प्रहरी नायव महानिरिक्षक सुरेन्द्र मैनाली र राष्ट्रिय अनुसन्धान विभागका अनुसन्धान निर्देशक भीमबहादुर बुढाथोकी सदस्य रहेका छन् । समितिलाई प्रतिवेदन पेस गर्न ७ दिनको समयाबधी दिइएको छ ।
प्राथमिक स्वास्थ्य केन्द्रको स्तरोन्नति विषयमा भएको प्रदर्शनका क्रममा स्थानीय युवा जयशंकर साहको मृत्यु भएको थियो । शुक्रबार प्रदर्शनका क्रममा मारिएका स्थानीय युवा जयशंकर साह आन्दोलनकारी नभएको पनि प्रमाणित भएको छ । सर्लाहीका प्रहरी प्रमुख एसपी प्रविण धितालले मृतक युवा आन्दोलनकारी नभएको बताएका हुन् । उनि होटल तथा कुखुरा दानाको होलसेल विक्रेता हुन् । आन्दोलनकारीले हतियार खोस्न खोज्दा चलेको गोली साहलाई लागेको प्रहरीको दाबी छ ।
