काठमाडौं । गायक योगेश्वर अमात्यको जग्गाको नक्कली लालपुर्जा बनाएर १९ करोड ऋण लिने पक्राउ परेका छन् । जग्गा हिनामिना गराउन नक्कली लालपुर्जा बनाउने दुई जना पक्राउ गरिएको प्रहरीको केन्द्रीय अनुसन्धान ब्युरोले जनाएको छ । पक्राउ पर्नेहरुमा ललितपुर महानगरपालिका–४ जावलाखेलका उविन्द्रराज शाक्य र शोभा शाक्य रहेका छन् ।
गायक अमात्यको बारास्थित १२ बिघा जग्गाको किर्ते कागजात बनाएर १९ करोड रुपैयाँ बैंकबाट निकालेर ठगी भएको थियो । प्रहरीले २०७८ कात्तिकमा चार जनालाई पक्राउ गरेको थियो । त्यसमध्ये दुई जना फरार रहेकोमा हाल पक्राउ गरिएको सीआइबीले जनाएको छ ।
जग्गाको रेखदेख गर्नेबाट उनको जग्गामा अनधिकृत व्यक्तिहरू आएर शङ्कास्पद गतिविधि गर्ने गरेको जानकारीका आधारमा खोजबिन गर्दा उनको जानकारीबिना नै जग्गा कुमारी बैंक न्युरोड शाखामा धितो राखेर १९ करोड रुपैयाँ बराबरको कर्जा लिएको खुलेको थियो । त्यसपछि गायक अमात्य कानुनी उपचारमा गएका थिए ।
नक्कली लालपुर्जा बनाएको कसुरमा काठमाडौँका एसके महर्जन र मुक्तिलाल गौतम र बैंकका कर्मचारीहरू यस अघि नै पक्राउ परिसकेका छन् ।
