सर्लाहीको बरहथवा नगरपालिकाकी मेयर कल्पना कुमारी कटवालको घरमा ढुंगामुढा भएको छ ।
शुक्रबार नगरपालिका परिसरमा भएको प्रदर्शन नियन्त्रण गर्न प्रहरीले चलाएको गोलीका कारण एक युवकको मृत्यु भएपछि मृतकका परिवार तथा आफ्न्तले त्यसयता झनै प्रदर्शन चर्काएका छन् । आइतबार पनि उनीहरुले इलाका प्रहरी कार्यालय बरहथवा र बरहथवा नगरपालिकाकी मेयरको घरमा ढुंगामुढा गरेका हुन् । अवस्था तनावपूर्ण भएपछि प्रहरीले आइतबार पुनः ८ सेल अश्रुग्यास हानेको छ ।
शुक्रबार बरहथवा ६ को प्राथमिक स्वास्थ्य केन्द्रको स्तरोन्नतिका विषयमा भएको प्रदर्शन नियन्त्रणमा लिने क्रममा प्रहरीले चलाएको गोली लागेर स्थानीय जयशंकर साहको मृत्यु भएको थियो । आन्दोलनमा सहभागीनै नभएको जयशंकरको मृत्यु भएपछि स्थानीयले विभिन्न माग राख्दै दिनहुँ प्रदर्शन गर्दै आएका छन् ।
मृतकका परिवारले साहलाई शहीद घोषणा गर्नुपर्ने, मृतकको नामबाट प्राथमिक स्वास्थ्य केन्द्र बरहथवाको नामकरण र स्तरोन्नति गर्नुपर्ने, र बरहथवाका मेयरले राजीनामा दिनु पर्ने लगायतका माग राखेर आन्दोलनरत छन् ।
अवस्था सामान्य नभएको भन्दै आइतबारसम्म कर्फ्यु जारी गरेको प्रशासनले सोमबार बिहान ८ बजेसम्मका लागी कर्फ्यु थपेको छ ।
