काठमाडौं । सात बुँदे माग राख्दै पेट्रोलियम ढुवानी गर्ने ट्यांकर चालक आन्दोलित भएका छन् । ढुवानी मजदुरहरूको तलब भत्ता श्रम ऐन अनुसार हुनु पर्ने र श्रमिकहरूको सुरक्षा ग्यारेन्टी गरिनु पर्ने लगायतका माग राख्दै ट्यांकर चालकहरूले पेट्रोलियम ढुवानी नै रोकेको नेपाल पेट्रोलियम ट्यांकर चालक संघका अध्यक्ष ईश्वर लामाले बताए ।
जेठ ३२ गते देखि कालोपट्टी बाँधेर काम गरेको र आज बागमती प्रदेशमा इन्धनको वितरण गर्ने थानकोट डिपोमा इन्धन नखन्याई विरोध प्रदर्शन गरिरहेको लामाले बताए ।
‘आफूहरूको माग पुरा नहुन्जेलसम्म निगमको डिपोमा तेल नखन्याउने र पम्पहरूलाई पनि वितरण नगर्ने हाम्रो आन्दोलनको कार्यक्रम हो,’ अध्यक्ष लामाले भने, ‘हाम्रो माग पुरा गर्न निगम र मन्त्रालयले चासो नै नदेखाएका कारण हड्तालमा उत्रिन परेको हो ।’
आफ्नो सात बुँदे माग पुरा नगरेसम्म ढुवानी सुचारु नगर्ने उनीहरूको दाबी छ । चालकहरूको हड्तालका कारण थानकोट डिपोबाट इन्धनको वितरण नै प्रभावित भएको छ । करिब ३ सय ढुवानीका ट्यांकर डिपो अघि तेर्स्याएर उनीहरु आन्दोलनमा छन् ।
श्रम ऐनअनुसार नियुक्ति र सुविधासँगै, स्वरोजगारको हकमा मात्र लागू गरिएको दोब्बर बैंक ग्यारेन्टी र वार्षिक नवीकरण खारेज गर्न, तापक्रमको सही व्यवस्था गर्न, सामाजिक सुरक्षा कोषमा आवद्ध गराउन लगायतका माग गरेका छन् ।
नेपाल आयल निगमका प्रवक्ता मनोज ठाकुरले इन्धन वितरणमा मजदुरका कारण अवरोध भएको बताए । ‘इन्धनको वितरणमा ढुवानी श्रमिकहरूका कारण अवरोध भएको छ,’ प्रवक्ता ठाकुरले भने,‘ हामी छलफल र वार्ता गर्देछौँ ।’
आफ्नो मालिसँग राख्नु पर्ने माग निगमसँग राखेर वितरण प्रणाली अवरुद्ध पारिएको ठाकुरले बताए ।
