शैक्षिक प्रमाणपत्र किर्ते गरेको आरोपमा नेपाल वायुसेवा निगमका पाइलट सम्राटबहादुर शाहविरूद्ध अख्तियार दुरूपयोग अनुसन्धान आयोग टंगालले मुद्दा दायर गरेको छ । आयोगले बिहिबार काठमाडौँ विशेष अदालतमा मुद्दा दायर गरेको हो ।
२०७१ फागुन १० गते नेपाल वायुसेवा निगममा नियुक्त भएका उनी जुनियर क्याप्टेन हुँदै क्याप्टेनमा बढुवा भएका थिए । उनले भारतको सेकेन्डरी एडुकेशन काउन्सिल, उत्तरप्रदेश अन्तर्गत भि.एस.जे इन्टर कलेज साराहारी गोरखपुरबाट इन्टरमिडियट एग्जामिनेशन, २००३ प्रथम श्रेणीमा उत्तीर्ण भएको प्रमाणपत्र पेश गरेका थिए।
उनको शैक्षिक योग्यताको प्रमाणपत्र नक्कली रहेको भन्दै आयोगमा उजुरी परेको थियो । उक्त उजुरीउपर अनुसन्धान गरेको आयोगले उनको प्रमाणपत्र नक्कली भएको निस्कर्ष निकालेको थियो । उनले नक्कली कागजात पेश गरेर क्याप्टेन पदको लाभ लिइ भ्रष्टाचार गरेको भन्दै अख्तियारले मुद्दा दायर गरेको हो।
उनीविरूद्ध भ्रष्टाचार निवारण ऐन, २०५९ को दफा १६ को उपदफा १ बमोजिम सजाय मागदाबीसहित मुद्दा दायर गरेको छ।
