काठमाडाैँ । राष्ट्रिय स्वतन्त्र पार्टीका सभापति रवि लामिछानेले पछिल्लो समय सरकारले उपसभामुखलाई गर्न लागिएको भनिएको कारबाही गल्ती हुने बताएका छन् । बुधबार पार्टीको सचिवालय बैठकबाट बाहिरिने क्रममा सञ्चारकर्मीसँग कुराकानी गर्दै सभापति लामिछानेले आफूले यसबारे सरकारमा जिम्मेवार पदमा रहेकाहरुसँग पनि कुराकानी गरेको र त्यो कदम चालिए घातक हुने बताएको जानकारी गराए ।
‘२ तिहाई सरकारका प्राथमिकताहरु धेरै छन् । २ तिहाई भनेको शक्ति हो, त्यो शक्ति कहाँ प्रयोग गर्नुपर्छ भन्ने कुरा तपाईँहरुले पक्कै बुझ्नुहुन्छ होला भनेर मैले उहाँहरुलाई सौहार्दपूर्ण रुपमा भनेको छु । उहाँहरुलाई मैले यो सोचिरहनु भएको हो भने त्यो अत्यन्तै गलत हुन्छ र यो सायद घातक हुन्छ भनेको छु ।’, सभापति लामिछानेले भने ।
त्यस्तै उनले मंगलबार आफूलाई पोखरामा देखाएको कालो झण्डालाई सामान्य रुपमा लिनुपर्ने बताए । करोडौँ बचत गरेका बचतकर्ताहरुमा आक्रोश हुन्छ, त्यो आक्रोश सांकेतिक रुपमा देखिएको उनले बताए ।
