काठमाडौँ । सरकारले काठमाडौँ महानगरपालिकाको प्रमुख प्रशासकीय अधिकृतमा सहसचिव प्रदीप परियारलाई पठाएको छ । यसअघिका प्रमुख प्रशासकीय अधिकृत रहेका बसन्त अधिकारले मेयरको निर्णयको माइन्युटनै परिवर्तन गरेको भन्दै काठमाडौँका मेयर बालेन्द्र शाहले बिदा बस्न भनेका थिए ।
साथै उनले बिदा छोट्याएर आउन खोजेपछि प्रमुख प्रशासकीय अधिकृतको कार्यकक्षमा ताला लगाइदिएका थिए ।
महानगरबाट अधिकारीलाई सरकारले मधेश आयोगमा पठाएको छ भने उनको ठाउँमा राष्ट्रिय योजना आयोगमा रहेका सहसचिव परियारलाई पठाएको हो ।
यस्तै ६० किलो सुन प्रकरणमा तानिएका अध्यागमन विभागका तत्कालीन महानिर्देशक झलकराम अधिकारीलाई पनि नेपाल ट्रष्टको कार्यालयमा पठाएको छ । ६० किलो सुन तस्करीका नाइके दावा छिरिङसँग नियमित सम्पर्कमा रहेका अधिकारीको विषय सिधाकुराले प्रकाशन गरेपछि गृह मन्त्रालयले उनलाई मन्त्रालय तानेको थियो । हाल सामान्य प्रशासन मन्त्रालयमा जगेडामा रहेका उनलाई ट्रष्टको कार्यालयमा सरुवा गरेको हो ।
उनीहरूसँगै सरकारले २९ जना सहसचिवको सरुवा गरेको छ । सरुवा सूची अनुसार नारायण प्रसाद रिसाल गृहबाट अर्थ मन्त्रालय, सेवन्तक पोखरेललाई अर्थबाट मधेस प्रदेशको अर्थ मन्त्रालयमा प्रदेश सचिवमा, सेवन्त राज दाहाललाई राष्ट्रिय समावेशी आयोगबाट गण्डकी प्रदेशको प्रदेश प्रमुखको कार्यालयमा प्रदेश सचिवमा, वासु देव दाहाललाई कोशी प्रदेशको सामाजिक विकास मन्त्रालयबाट गृह मन्त्रालयमा, परराष्ट्रका सहसचिव छविन्द्र पराजुलीलाई कोशी प्रदेशको प्रदेश सचिवमा पठाइएको छ ।
