१४ असाेज, काठमाडाैँ : अख्तियार दुरूपयोग अनुसन्धान आयोगले पशुपतिनाथको सुनको जलहरीमा हिनामिना गरेको आरोपमा तीन जनाविरूद्ध भ्रष्टाचारको मुद्दा दायर गरेको छ।
पशुपतिनाथको मन्दिरस्थित गर्भगृहमा सुनको जलहरी राख्ने क्रममा भ्रष्टाचार भएको ठहरसहित अख्तियारले पशुपति क्षेत्र विकास कोषका तत्कालीन सदस्य–सचिव डा. प्रदिप ढकाल र कोषका तत्कालीन कोषाध्यक्ष एवम् हालका सदस्य सचिव डा. मिलन कुमार थापासहित तीनजनाविरुद्ध सार्वजनिक सम्पत्ति हानि नोक्सानी गरी भ्रष्टाचार गरेको आरोपमा विशेष अदालतमा मुद्दा चलाएको हो।
त्यस्तै अख्तियारले विकास कोषमा कार्यरत स्टोर किपर अरुण कुमार श्रेष्ठविरुद्ध पनि भ्रष्टाचार मुद्दा चलाएको हो। उनले जलहरीका लागि प्रयोग गरेको सुन हिनामिना गरेको अख्तियारको आरोप छ ।
उनीहरूमाथि एक करोड १७ लाख १ हजार ७२१ रुपैयाँ बराबरको भ्रष्टाचार गरेको आरोप छ। उनीहरूले एक किलो ४ सय ९१ ग्राम ७ सय १८ मिलिग्राम सुन हिनामिना गरेको आरोप छ ।
जलहरी हिनामिनामा ढकाल र डा. थापाको प्रत्यक्ष भूमिका रहेको अख्तियारले जनाएको छ ।
