राइड शेयरिङ एप टुटलका संस्थापक शिक्षित भट्ट पक्राउ परेका छन् ।
टुटल स्थापना गर्दाका साझेदारहरूले जिल्ला प्रहरी परिसर, काठमाडौँमा दिएको उजुरीका आधारमा उनलाई पक्राउ गरिएको काठमाडौँ प्रहरी परिसरले बताएको छ । उनी गत बिहिबार पक्राउ परेका हुन् ।
उनीमाथि प्रतिलिपि अधिकारको उल्लंघन गरेको र आपराधिक विश्वासघात गरेको आरोप रहेको छ ।
टुटल स्थापना गर्दाका साझेदारबीच लगानी र ट्रेडमार्कबारेमा भएको सम्झौता पछिल्लो समय आएर नमिल्दा उनका साझेदारले उनीविरुद्ध जाहेरी दिएका हुन् ।
साझेदारहरूको विवादका कारण बन्द भएको टुटल केही महिनाअघि भट्टले संचालनमा ल्याएका थिए । उक्त समयमा टुटल छाडिसकेका उनका साझेदारहरूले नेपाल प्रतिलिपि अधिकार रजिष्ट्रारको कार्यालयमा उजुरी दिए। पछि उनीहरुले प्रहरीमा समेत उजुरी दिएका हुन् ।
साथीहरुबिच भएको विवादका कारण प्रहरीले दोस्रो पक्षलाई छलफलका लागि बोलाउने र समस्या समाधान नभए आपराधिक विश्वास घात र प्रतिलिपि अधिकार संरक्षणसम्बन्धी मुद्दामा म्याद थपि अनुसन्धान गर्ने प्रहरीले बताएको छ ।
