काठमाडौँ । काठमाडौँको थापाथलीस्थित प्रसुति गृहबाट एक बच्चा चोरी भएको छ ।
केहीबेर अघि एक बच्चा चोरी भएको प्रहरी वृत सिंहदरबारले सिधाकुरालाई जानकारी दिएकाे छ। प्रहरीका अनुसार थापाथलीस्थित प्रसुति गृह अस्पतालको कम्पाउण्डबाट २६ दिनको बच्चा चोरी भएको हो ।
चौरीदेउराली गाँउपालिका ३ काभ्रेपलाञ्चोक घर भई काठमाडौँको कपन बस्ने वर्ष २२ की सबिना श्रेष्ठले बोकिराखेको अवस्थामा २६ दिनकी छोरीलाई एक अपरिचित महिलाले लगेर फरार भएकी हुन् ।
सविनाले २६ दिनअघि छोरीलाई प्रसूति गृहमै जन्माएकी थिइन् । शल्यक्रियापश्चात जन्माएकी छोरीलाई जन्डिस भएपछि उनीहरुले निरन्तर अस्पतालमै राखेर उनको उपचार गराएर तीन दिनअघि मात्र घर लगेका थिए । शुक्रबार फलोअपका लागि अस्पताल पुगेर लाइनमा चिकित्सकको पालो पर्खिरहेका बेला अर्को लाइनमा बसेकी एक महिलाले छोरी बोेकिदिन्छु भनेर लगेको प्रहरीले बताएको छ ।
बच्चा लिएर फरार हुनेकाे थप अनुसन्धान र खाेजीकार्य भइरहेको प्रहरीले जनाएको छ ।
