काठमाडौं । राष्ट्रिय स्वतन्त्र पार्टी (रास्वपा)ले प्रतिनिधिसभाको विशेष अधिवेशन बोलाउन माग गर्दै सबै राजनीतिक दलहरुको ध्यानाकर्षण गराएको छ ।
दुईतिहाइको सरकार कामचलाउ जस्तो भएकोसमेत दाबी गर्दै रास्वपाका कार्यबाहक प्रवक्ता मनिष झाले मंगलबार विज्ञप्ति जारी गर्दै राष्ट्रिय जीवनका तमाम समसामयिक विषयहरुबारे तत्काल छलफल गर्न आवश्यक देखिएकाले प्रतिनिधिसभाको विशेष अधिवेशन बोलाउन अपिल गरेका हुन् ।
विपद्को पूर्वतयारीमा सरकारको चुकेको दाबी गर्दै व्यवस्थापनमा समेत सरकारका असफल भएको आरोप लगाएको छ । साथै पार्टी कार्यालय निमार्णका लागि विवादित व्यवसायीसँग दान लिएको जग्गाका विषयमा समेत रास्वपाले स्वार्थको द्वन्द्वको डरलाग्दो अभ्यास गरेबाट सुशासनको अडानमा धरमराएकोरुपमा बुझेको जनाएको छ ।
विज्ञप्तिमा भनिएको छ, ‘विपद्को पूर्वतयारीमा चुकेको सरकार व्यवस्थापनमा पनि असफल भएको छ । मुद्दा खेपिरहेका विवादित व्यापारीबाट करोडौं मूल्य पर्ने जग्गा दान लिएर सत्ताको नेतृत्व गर्ने दलले नै स्वार्थको द्वन्द्वको दरलाग्दो अभ्यास गरेबाट सुशासनको अडान धरमराएको छ । संविधान संशोधनको बहसमा औचित्य पुष्टि हुनेगरी सरकारले श्वेतपत्र नै जारी गर्ने अपेक्षा थियो, तर उक्त विषय अहिले ओझेलमा पारिएको छ ।’
सरकारको तीन महिने अवधि पूर्ण मूल्यांकनको आधार नभए पनि यसबीचमा घोषित प्रतिबद्धताहरु पूरा गर्नेतर्फ सरकारले प्रारम्भिक संकेतसम्म नदेखाएको रास्वपाको निष्कर्ष छ ।
