काठमाडाैँ । राष्ट्रिय स्वतन्त्र पार्टीले विभिन्न २१ अलपत्र आयोजनाहरुमा दबाद यात्रा गर्ने भएको छ । आगामी माघ २१ गतेबाट देशभरका विभिन्न अलपत्र आयोजनामा दबाद यात्रा गर्ने पार्टीले जनाएको छ ।
पार्टीले कोशी प्रदेशमा ३ जना सांसदहरुको अगुवाईमा दबाब यात्रा गर्ने भएको छ । रास्वपाकी सांसद तोसिमा कार्कीले भेडेटार–रवि राँके सडकखण्ड, निशा डाँगीले सगरमाथा राजमार्गअन्गर्ततको गाईघाट–दिक्तेल सडकखण्ड र अशोककुमार चौधरीको नेतृत्वमा इनरुवा–देवानगंज– कोवाखोच सडकखण्डमा पैदल यात्रा गर्ने भएका छन् ।
त्यस्तै मधेश प्रदेशमा गणेश पराजुलीको नेतृत्वमा कमला पूल र हेटौँडा–ढल्केवर–इनरुवा ट्रान्समिसन लाइन, मनीष झाको नेतृत्वमा जनकपुर परिक्रमा सडक र डीपी अर्यालको नेतृत्वमा काठमाडौँ–मधेश द्रुतमार्गमा दबाब यात्रा गर्ने पार्टीले जनाएको छ ।
बागमती प्रदेशको मेलम्ची खानेपानी आयोजनामा सोबिता गौतमको टिम, नारायणगढ–पुल्चोक–गोन्द्राह सडकखण्डमा रवि लामिछाने र पासाडल्हामु सडक आयोजनामा सुमना श्रेष्ठको टिमले दबाब यात्रा गर्ने भएको हो ।
गण्डकी प्रदेशको मध्यपहाडी लोकमार्ग अन्तर्गतको बुर्तिबाङ–बाग्लुड सडकखण्डमा शिव नेपाली नेतृत्वको टिम, चितवन र तनहुँ जिल्लामा पर्ने घुमाउने पुल र सडक स्तरोन्नतिका लागि स्वर्णिम वाग्ले र गोरखाको ११ किलो–छेपेटार–भालुस्वाँरा–वारपाक सडकखण्डमा हरि ढकालको टिमले दबाय यात्रा गर्ने भएको छ ।
लुम्बिनी प्रदेशको घोराही–तुल्सीपुर–सल्यान र पश्चिम रूकुम सडकखण्डमा शिशिर खनाल, न्यू बुटवल–गोरखपुर ट्रान्समिसन लाइनमा डा. मुकुल ढकालको टिम र लुम्बिनी विकास गुरूयोजनामा लक्ष्मी तिवारीको टिमले दबाब यात्रा गर्ने भएको छ ।
कर्णाली प्रदेशको भेरी–बबई डाइभर्सनमा बिनिता कठायत, कर्णाली राजमार्गमा सन्तोष परियार र कोहलपुर–सुर्खत–जुम्ला ट्रान्समिसन लाइनमा विन्दाबासिनी कंसाकारको टिमले दबाब यात्रा गर्ने भएको छ ।
सुदूरपश्चिम प्रदेशको महाकाली करिडोरमा असिम शाह, दैजी–जोगबुढा सडकखण्डमा चन्दा कार्की र धनगढी–दीपायल फास्ट ट्रयाक खण्डमा विराजभक्त श्रेष्ठको टिमले दबाब यात्रा गर्ने भएको छ ।
यस दबाब यात्रालाई माघ २१ गते रास्वपाका सभापति रवि लामिछानेले सुरुवात गर्ने बताइएको छ । उनले गत पुस ९ देखि ११ गतेसम्म नारायणगढ–बुटवल ११३ किमी सडकमा दबाब यात्रा गरेका थिए ।
लामो समयदेखि अलपत्र आयोजनामा नागरिकले सास्ती बेहोर्नु परेको भन्दै रास्वपाले दबाब यात्रा गर्ने भएको हो ।
