काठमाडौँ । हेलिकप्टरमा काठमाडौँ आउन कुरेर बसेका भारतीय पर्यटक आधा बाटोमै हेलिकप्टर खसेपछि स्याफ्रुबेंसीदेखि जिपमा काठमाडौँ फर्किएका छन् । काठमाडौँबाट स्याफ्रुबेंसी लागि उडेको एयर डाइनेष्टीको हेलिकप्टर बुधबार दिउँसो नुवाकोटको सूर्य चौरमा दुर्घटनामा परेको थियो । दुर्घटनामा हेलिकप्टरका चालकसहित ५ जनाको मृत्यु भएको थियो ।
सो हेलिकप्टर रसुवाको स्याफ्रुबेंसीका लागि दिउँसो १ बजेर ५४ मिनेटमा उडेको नेपाल नागरिक उड्यायन प्राधिकरणले जनाएको छ । चिनियाँ पर्यटक छोडेर हेलिकप्टरले ४ जना भारतीय पर्यटकलाई काठमाडौँ ल्याउने तयारी गरेको थियो ।
जसअनुसार ५ जना भारतीय पर्यटक हेलिकप्टर कुरेर बसेको स्याफ्रुका होटल व्यवसायी दावा सोनाम लामाले सिधाकुरालाई बताए । ‘चिनियाँ नागरिक छोडेर भारतीय नागरिक लिएर जाने भनेर उडेको हेली आधा बाटोमै खसेछ,’ लामाले भने,‘दुःखद दुर्घटना भयो । हेलिकप्टर कुरेर बसेकाहरू भर्खरै जिपमा काठमाडौँका लागि निस्किएका छन् ।’ दुःखद दुर्घटनाको समाचार आएपछि भारतीय पर्यटकले आकस्मिक रुपमा जिपको व्यवस्था गरेर काठमाडौँ निस्किएको उनले बताए ।
