काठमाडौँ । मगर समुदायले काठमाडौँको टुँडिखेलमा शनिबारबाट भूमे पर्वको सुरुवात गरेका छन् । मगर समुदायले बाढी, पहिरो, भूकम्पजस्ता प्राकृतिक विपत्ती नआओस भन्ने कामनासहित भूमीलाई पूजा गरेर यो पर्व मनाउने गर्दछन् । ३ दिनसम्म विविध साँस्कृतिक कार्यक्रमहरुको आयोजना गरी मनाइने भूमे पर्वमा सहभागी हुनको लागि सबैलाई आग्रह गरिएको छ ।
भूमे पूजामा मार (भेंडा, बोका, कुखुरा, सुंगुर) लाई मन्साएर लखेटी गाउँ निकाला गर्ने चलन छ । जसलाई भूम्या निकाल्ने भनिन्छ । भूम्या निकाल्दा महिलाले नाङ्लो (सुपो) मा ध्वाँसो, खरानी, दशैंको बेला ढोकामा चढाएको टीका जमरा, गहुँ, जौ, कमै, धान, कोदो, तोरी, आदि राखेर घरबाहिर फाल्ने चलन छ । यसो गरेमा घरभित्रका पीर मर्का भूम्या पर्वसँगै हट्छ भन्ने मान्यता छ । भूम्या थानमा देवतालाई बली दिएर पूँजापाठ गरिसकेपछि लगातार पाँच दिनसम्म भूम्या नाच नाचिन्छ ।
