काठमाडौँ । टिकटक बन्द गर्ने सरकारको निर्णयविरुद्ध ५ वटा रिट सर्वोच्चमा पुगेका छन् । सबै रिटमा सरकारको निर्णय खारेजीको माग गरिएको छ ।
सरकारको उक्त कदमविरूद्ध अधिवक्ता दिनेश त्रिपाठीसमेत सर्वोच्च पुगेका हुन्। त्रिपाठीले शुक्रबार सर्वोच्चमा रिट दिएका छन्।
सर्वोेच्च अदालतका अनुसार टिकटक बन्दविरुद्ध सर्वोच्च अदालतमा पुगेका रिटहरु अध्ययनका क्रममा रहेको र अध्ययनपछि रिट दर्ता हुने कि नहुने वा कुन कुन रिट दर्ता हुने भन्ने टुंगो लाग्ने छ ।
सार्वजनिक शिष्टाचार विरुद्धका कसुरहरु धेरै भएको र टिकटक कम्पनीले टिकटकबाट हुने अपराध न्युनिकरण र दोषीमाथिको कारवाही प्रक्रियामा सहयोग नपुराएको भन्दै नेपालमा तत्कालका लागि टिकटक बन्द गर्ने निर्णय लिएको थियो ।
गत कात्तिक २७ गतेको मन्त्रिपरिषद् बैठकबाट टिकटकमा प्रतिबन्ध लगाउने निर्णय भएसँगै नेपालका अधिकांश इन्टरनेट सेवा प्रदायकहरुले टिकटक नचल्ने बनाएका छन् ।
