काठमाडौँ । ट्राफिक प्रहरी प्रभाग, दरबारमार्गमा कार्यरत प्रहरी जवान युवराज घिमिरेको हत्यामा संलग्न रहेको आरोपमा ७ जनालाई पक्राउ गरी प्रहरीले सार्वजनिक गरेको छ । काठमाडौँ प्रहरी परिसरले आइतबार पत्रकार सम्मेलन गरी उनीहरुलाई सार्वजनिक गरेको हो ।
पक्राउ पर्नेमा भक्तपुरका आइते भनिने २१ वर्षीय सचिन परियार, नुवाकोट घर भएकी १८ वर्षीया अञ्जली श्रेष्ठ, स्याङ्जाकी २१ वर्षीया विपना भनिने वसुन्धारा कार्की, स्याङ्जा की ५६ वर्षीया नुनमाया कार्की, नुवाकोट घर भएका २१ वर्षीय बुद्ध लामा तामाङ, सिन्धुपाल्चोक घर भएका ३० वर्षीय दोर्जे भनिने अमृत तामाङ र १३ वर्षका नाबालक छन् ।
उनीहरुलाई पक्राउ गर्ने क्रममा अस्ट नारायण हल पछाडी र बाइसधारा जंगलमा हवाई फायर समेत गरेको थियो । काठमाडौँ प्रहरी परिसरले आइतबार पत्रकार सम्मेलन गर्दै जंगलबाट उम्कन खोजेपछि १ राउण्ड हवाई फायर गरिएको जानकारी दिएको हो ।
पक्राउ परेकामध्ये सचिन परियारसँग प्रहरी जवान घिमिरेको चिनजान रहेको प्रहरीले जनाएको छ ।
प्रहरीका अनुसार उनीहरुले घिमिरेको हत्या गरी एक निर्माणाधीन घरको भुइँमा म्याट्रेसले छोपेर लुकाएका थिए भने मृतकले लगाएको लुगा जलाएर नष्ट गरेका थिए ।
प्रहरी जवान घिमिरेको शव शुक्रबार रक्ताम्य अवस्थामा मनमैजुको एक निर्माणाधिन घरमा फेला परेको थियो ।
