काठमाडौँ । काठमाडौँ महानगरपालिकाले नाम परिवर्तन गर्न अटेरी गर्ने विद्यालयलाई विषय तथा कक्षा थप गर्न तथा स्थान परिवर्तन गर्न रोक लगाएको छ । आइतबार प्रमुख बालेन्द्र शाह (बालेन) को अध्यक्षतामा बसेको वैठकले नाम परिवर्तन नगर्ने विद्यालयलाई निवेदनकमोजिमका आुमति नदिने निर्णय गरेको हो ।
कक्षा तथा विषय थपका लागि महानगरमा ४१ वटा निवेदन परेका थिए । यीमध्ये ७ वटालाई अनुमति नदिने निर्णय गरिएको हो । नाम परिवर्तनको निवेदन प्राप्त भए थप ४ वटालाई अनुमति दिने निर्णय भएको महानगरले जनाएको छ ।
उक्त बैठकमा शिक्षा समितिले २७ वटा विद्यालयलाई भने कक्षा र विषय थप गर्न अनुमति दिने निर्णय गरेको छ । सम्बन्धित क्षेत्रका विद्यालय निरीक्षक, स्रोत शिक्षक र महानगरपालिकाको सहरी योजना आयोगले गरेको स्थलगत अनुगमनबाट प्राप्त सिफारिसका आधारमा कक्षा र विषय थप गर्न अनुमति दिएको हो ।
स्थान परिवर्तनका लागि आएका ७ वटा निवेदनमाथि छलफल गर्दै, नाम परिवर्तनको निवेदन दिएमा ४ वटालाई अनुमति दिने निर्णय भएको छ । एकीकृत शैक्षिक व्यवस्थापन सूचना प्रणालीमा उल्लेख भएको तर उल्लेख गरिएको ठाउँमा विद्यालय नभएकोले वडा नं. १० थापागाउँको डेनेव एकेडेमीलाई अनुमति दिइएन । यस्तै ठेगाना दिएको स्थान, महानगरपालिका वडा नं. १० वानेश्वरमा नभएकोले काठमाडौँ मेरिगोल्ड स्कूललाई पनि अनुमति नदिइएको हो । निवेदकमध्ये वडा नं. ३१ को भी. एस. निकेतन सेकेण्डरी स्कूलले भने वडा नं. ३२ को सुविधानगरमा स्थान सर्ने अनुमति पाएको छ ।
त्यस्तै वैठकले, नामसारीका लागि आएका ४ वटा निवेदनमध्ये २ वटालाई अनुमति नदिने, २ वटाले नाम परिवर्तनका लागि निवेदन दिए अनुमति दिने निर्णय गरेको छ ।
