धनगढीः धनगढी उपमहानगरपालिकामा अस्पताल बनाउने भन्दै लेट मेइन धनगढी र नेपाल लाइफ वर्ड मिसनले निमार्ण गरेका २ भवनमा चर्च बनाएपछि उपमहानगरले ती भवनमा डोजर चलाएको छ । नगरपालिकासँग एक प्रयोजन भनेर भवन निर्माण गरिएको तर ति संरचनाहरु मापदण्ड विपरित रहेको पाइएपछि मंगलबार उपमहानगरले डोजर चलाएको हो ।
सोमवार उपमहानगर वडा नं ७ ले लेट मेइन धनगढी प्रालि र नेपाल लाइफ वर्ड मिसनको दर्ता खारेजी गरेको थियो।
लेट मेइन धनगढी प्रालिले २०८० साउन २२ गते वडा कार्यालयमा सिपमूलक तालिम तथा परामर्श सेवा सञ्चालन गर्ने प्रयोजन राखी वडा कार्यालयमा व्यवसाय दर्ता गराएको थियो। यस्तै, नेपाल लाइफ वर्ड मिसनले २०८१ बैशाख १६ गते सेमिनार, तालिम आदि सञ्चालन गर्ने प्रयोजनका लागि वडामा व्यवसाय दर्ता गराएको थियो।
तर सो जग्गामा दुई करोडको लागतमा दुई तले चर्च निर्माण गरिएको पाइएपछि दर्ता खारेज गरिएको हो। यस अगाडि सो कार्यमा संलग्न ३ जनालाई प्रहरीले पक्राउ गरिसकेको छ।
