काठमाडाैँ : सिद्धबाबा भनिने कृष्णबहादुर गिरीविरुद्ध उच्च अदालत विराटनगरमा बलात्कार सम्बन्धी मुद्दाको पुनरावेदन परेको छ ।
सुनसरीको बराहक्षेत्र निवासी गिरीलाई सुनसरी जिल्ला अदालतले बलात्कार सम्बन्धी मुद्दामा गत भदौ २७ मा सफाइ दिने निर्णय गरेको थियो । जबरजस्ती करणीको आरोप लगाउने व्यक्तिले नै प्रमाणको भार पुर्याउनुपर्ने भन्दै जिल्ला अदालतले गिरीमाथिको आरोप प्रमाणित हुन नसकेको भन्दै उनलाई सफाइ दिएको हो । जिल्ला अदातलको फैसलाविरुद्ध जिल्ला सरकारी वकिलको कार्यालय सुनसरीले उच्च अदालत विराटनगरमा पुनरावेदन गरेको हो ।
गिरीमाथि २०७६ कात्तिक ४ गते एकजना भक्तमाथि जबरजस्ती करणी गरेको आरोप छ । रामकृष्णाचार्य, वैष्णवकृष्ण दास नामले चिनिने सिद्धबाबा उदासी सम्प्रदायका धर्मगुरु भएता पनि अहिले बराहक्षेत्रबाट पलायन भएर काठमाडौँस्थित नानक सम्प्रदायको आश्रममा शरण लिएर बस्दै आएका छन् ।
