ओमनमा जारी एसीसी प्रिमियर कपमा हङकङविरुद्ध नेपालले जीत हात पारेको छ । ओमानको अल अमरेत क्रिकेट ग्राउण्ड–१ मा भएको खेलमा नेपालले हङकङलाई ८ विकेटले पराजीत गरेको हो । हङकङकसँग जीत हात पारेसँगै नेपालले सेमिफाइनलको यात्रा तय गरेको छ ।
वर्षाका कारण ढिलो गरी सुरु भएको खेल १८ ओभरमा झारिएको थियो। जसमा टस जितेर पहिला फिल्डिङ रोजेको नेपाललाई हङकङकले निर्धारित १७ दशलव ५ ओभरमा सबै विकेट गुमाउँदै एक सय १४ रनको लक्ष्य दिएको थियो । हङकङले दिएको लक्ष्य नेपालले १२.२ ओभरमा पूरा गरेको हो ।
नेपालका लागि मोहम्मद आसिफ सेखले सर्वाधिक ४० रन, कुशल भुर्तेलले ३२ रन बनाएका हुन् । त्यस्तै कप्तान रोहित पौडेल र सन्दीप जोराले क्रमश २५ र १९ रन बनाएका हुन् ।
एसीसी प्रिमियर कप अन्तर्गत नेपाल समूह ‘ए’ मा रहेको छ । उक्त समूहमा साउदी अरब, मलेसिया, हङकङ र कतारसमेत छन् ।
नेपालले यसअघि खेलेका दुवै खेलमा जित हासिल गरेको थियो । नेपाल पहिलो खेलमा मलेसियासँग पाँच विकेटले तथा दोस्रो खेलमा कतारसँग ३२ रनले विजयी भएको थियो ।
