एनसेल प्रकरणमा सांसद अमरेशकुमार सिंहले प्रधानमन्त्री पुत्री तथा स्वकीय सचिव गंगा दाहाललाई लगाएको आरोपमाथि छानबिन गर्न नेकपा एमालेनिकट विद्यार्थी संगठन अनेरास्ववियुले माग गरेको छ ।
सोमबार एक विज्ञप्ति जारी गर्दै अनेरास्ववियुले प्रधानमन्त्रीको परिवारकै सदस्यको भ्रष्टाचार, अनियमितता र कमिशन लेनदेनमा संलग्न रहेको भनाईप्रति घ्यानाकर्षण भएको बताएको छ ।
‘सामाजिक सञ्जाल र विभिन्न सञ्चारमाध्यममार्फत प्रधानमन्त्रीको स्वकीय सचिव गंगा दाहाललाई जोडेर विभिन्न व्यापारीसँग रकम बुझेको र त्यो सबै अडिओ तथा भिडिओ प्रमाण आफूसँग सुरक्षित रहेको र समय आएपछि सबै प्रमाण जनता र मिडियामा लिएर आउनेछु भन्ने प्रकृतिको अभिव्यक्तिले प्रधानमन्त्रीको सचिवालयमा रहेको जिम्मेवार तथा परिवारकै सदस्यको भ्रष्टाचार, अनियमितता र कमिशन लेनढेनमा संलग्न रहेको भनाई प्रति गम्भिर घ्यानाकर्षण भएको छ ।’, विज्ञप्तिमा भनिएको छ ।
त्यस्तै कुनै जिम्मेवार पदमा बसेर त्यस्ता गतिविधिमा संलग्न भएको आरोप लागिरहँदा छानबिन गरिनुपर्ने अनेरास्ववियुको माग छ । ‘बालुवाटार र सिंहरबारमा बसेर यस्ता गतिविधिमा संलग्न जो कोही भए पनि छानबिनको दायरामा ल्याई दोषीउपर कानूनबमोजिम कडा भन्दा कडा कारबा प्रक्रिया अगाडि बढाउन अनेरास्ववियु जोडदार माग गर्दछ ।’
त्यस्तै यस्ता वेतिथिविरुद्ध सरकार चुप बसे अनेरास्ववियुले त्यसको विरुद्ध चर्को भएर उत्रिने चेतावनीसमेत दिएको छ ।
