रौतहट । रौतहटको गढीमाई नगरपालिका- ७ मा स्यालको आक्रमणबाट एकै दिन १८ जना किसान घाइते भएका छन् ।
बिहिबार गाईबस्तुलाई घाँस काट्न गएका, बाली हेर्न खेतमा गएका किसानलाई स्यालले आक्रमण गर्दा उनिहरु घाइते भएको वडाअध्यक्ष टपेन्द्र राय यादवले जानकारी दिए ।
घाइते हुनेहरूमा अधिकांश गढीमाई नगरपालिका-७ धर्मपुर, धनाडी र लक्ष्मीपुर टोलका किसान रहेको वडाध्यक्ष यादबले बताए ।
स्यालको टोकाइबाट घाइते हुनेहरूमा महेन्द्र महतो नुनिया, मन्तोरिया देवीलगायतका सबै जना प्रादेशिक अस्पताल गौरमा उपचार लागि पुगेको एक स्थानीय जानकारी दिए।
स्थानीय स्वास्थ्य चौकी तथा नगर अस्पतालमा स्यालले टोकेपछि पाइने खोप उपलब्ध नभएकाले घाइते सबै प्रादेशिक अस्पताल गौर पुगेका हुन्। स्यालले जथाभावी टोक्न थालेपछि स्थानीय त्रसित बनेका छन्।
माघ ४, २०८० १०:२७ मा प्रकाशित
