काठमाडौं । विश्व स्वास्थ्य संगठन (डब्ल्यूएचओ) को दक्षिण पूर्वी एसियाको क्षेत्रीय निर्देशकका लागि नेपालका शम्भुप्रसाद आचार्य र बंगलादेशका प्रधानमन्त्री शेख हसिनाकी छोरी साइमा बाजेद भिड्दै छन् ।
भारतको नयाँ दिल्लीमा आयोजित डब्ल्यूएचओको दक्षिण पूर्वी एसियाको क्षेत्रीय कमिटी (सेरो) को बैठकले आज नयाँ क्षेत्रीय निर्देशक चयन गर्ने छ ।
नेपालको उम्मेदवार शम्भुप्रसाद आचार्य डब्ल्यूएचओमा कार्यरत हुन् भने बंगलादेशको उम्मेदवार प्रधानमन्त्री शेख हसिनाकी छोरी साइमा बाजेद हुन् ।
डब्ल्यूएचओको दक्षिण पूर्वी एसिया क्षेत्रमा नेपाल, भारत, भुटान, बंगलादेश, उत्तर कोरिया, इन्डोनेसिया, मालदिभ्स, म्यानमार, श्रीलंका, थाइल्याण्ड र टिमोर लिस्टे गरी ११ देश सदस्य छन् । यिनै ११ देशका स्वास्थ्य मन्त्रीहरु पालैपालो क्षेत्रीय अध्यक्ष हुन्छन् । उनीहरुले नै मतदान गरेर वा सहमतिमा क्षेत्रीय निर्देशक चयन गर्दछन् । यसपटक म्यानमानर बाहेकका १० देशका स्वास्थ्यमन्त्रीहरुले क्षेत्रीय निर्देशक चयन गर्दैछन् । म्यानमारमा सैनिक शासन भएको र त्यसलाई संयुक्त राष्ट्रसंघले मान्यता नदिएकाले उसले यसपटक क्षेत्रीय निर्देशक चयन गर्न पाउँदैन ।
