राजविराजस्थित मधेश प्रदेश कृषि विश्वविद्यालयको शिलान्यास कार्यक्रममा जसपाका अध्यक्ष उपेन्द्र यादवलाई प्रमुख अतिथि बनाइने भएपछि जनमतका कार्यकर्ताले विश्वविद्यालयमा तालाबन्दी गरेका छन् । उनीहरुले प्रमुख अतिथिमा आफूहरुको पार्टीको अध्यक्ष सिके राउतलाई प्रमुख अतिथि बनाइनुपर्ने माग राख्दै तालाबन्दी गरेका हुन् ।
सोमबार हुन लागेको शिलान्यास कार्यक्रमलाई लिएर जनमतका कार्यकर्ताले विश्वविद्यालयका उपकुलपतिलाई ज्ञापनपत्र बुझाउँदै कार्यालयमा तालाबन्दी गरेका हुन् ।
मधेस कृषि विश्वविद्यालयको भवन शिलान्याश कार्यक्रमलाई लिएर केही दिनदेखि जनता समाजवादी पार्टी र जनमत पार्टीबिच द्वन्द्व चलिरहेको थियो । अरु त अरु जनमतका अध्यक्ष सिके राउतले समेतले विश्वविद्यालयको निर्माणका लागि आफूले ३० करोड बजेटको पहल गरेको भन्दै यदि उपेन्द्र यादवलाई प्रमुख अतिथि बनाए त्यसको प्रतिकार गर्ने बताउँदै आएका थिए ।
त्यस्तै जनमत पार्टीका सप्तरी जिल्ला इन्चार्ज रामगमन साहले कृषि विश्वविद्यालयका भीसी तथा रजिष्ट्रारले विश्वविद्यालयलाई राजनीतिकरण गरेका कारण आफ्नो पार्टीले तालाबन्दी गरेको बताएका छन् ।
