काठमाडाैँ । सत्ता साझेदार दल नेकपा माओवादी केन्द्रसहित चार दल सम्मिलित समाजवादी मोर्चाको संयोजकमा नेपाल कम्युनिस्ट पार्टीका महासचिव नेत्रविक्रम चन्द विप्लव चयन भएका छन्।
आइतबार बिहान बालुवाटारमा एकीकृत समाजवादीका अध्यक्ष माधव कुमार नेपालको अध्यक्षतामा बसेको मोर्चाको बैठकले चन्दलाई संयोजक चयन गरेको हो ।
मोर्चा घोषणाका बेला प्रत्येक ४/४ महिना आलोपालो मोर्चाको नेतृत्व गर्ने सहमति भएको थियो । सोही सहमतिअनुरुप नेकपा माओवादी केन्द्रका अध्यक्ष प्रचण्डले र त्यसपछि माधव कुमार नेपालले नेतृत्व सम्हालेका थिए । उनीहरुको नेतृत्वपश्चात विप्लवले नेतृत्व सम्हालेका हुन् ।
त्यस्तै मोर्चाको बैठकपछि कुरा गर्दै माओवादी केन्द्रका महासचिव देव गुरुङले ५८ जिल्लामा समाजवादी मोर्चाको संयोजन समिति गठन भइसकेको र आगामी दिनमा देशका प्रमुख सहरमा जनपरिचालनका कार्यक्रम आयोजना गरिने बताए।
नेकपा माओवादी केन्द्र, जसपा, एकीकृत समाजवादी र नेत्रविक्रम चन्द विप्लव नेतृत्वको माओवादीका शीर्ष नेताहरुले गत असार ४ गते समाजवादी मोर्चा घोषणा गरेका थिए ।
