काठमाडाैँ । शिक्षा, विज्ञान तथा प्रविधिमन्त्री सुमना श्रेष्ठले शिक्षा क्षेत्रमा भएको दलीय राजनीजि अन्त्य गर्न आफू प्रतिबद्ध रहेको बताएकी छिन् । विद्यालय, विश्वविद्यालय लगायत जुनसुकै शैक्षिक क्षेत्रमा भएका र हुनेगरेका राजनीतिक हस्तक्षेप अन्त्य गर्न आग्रह गर्दै मन्त्रालय पुगेका प्राज्ञिकहरुको समूहसँग मन्त्री श्रेष्ठले शिक्षा क्षेत्रमा दलीय राजनीतिले दबदबा गरेको र त्यसको अन्त्य गर्न आफूले सुरुदेखि नै काम गरिरहेको बताएकी हुन् ।
‘दलीय राजनीति भएको ठाउँमा राम्रो मान्छेले प्रोत्साहन पनि नपाउने र खराब काम गर्नेलाई दण्डित गर्ने अवस्था छैन ।’, उनले थपिन् ‘तर शैक्षिक क्षेत्रको समुन्नत विकासका लागि शिक्षा क्षेत्रमा भएको दलीय राजनीति अन्त्य गर्न आफू प्रतिबद्ध र कटिबद्ध छु ।’
मन्त्रीकै श्रेष्ठकाे कार्यकक्षमा पुगेर प्राज्ञिकहरुको समूहले अध्ययन अनुसन्धानका लागि स्थापित उच्चस्तरका शैक्षिक–प्राज्ञिक संस्थाहरु बारम्बार राजनैतिक हस्तक्षेपबाट आक्रान्त हुनेगरेको भन्दै त्यस्ता गतिविधिलाई अन्त्य गर्न आग्रह गरेका छन् ।
मन्त्रीसँगको भेटका क्रममा प्राज्ञिक केदारभक्त माथेमाले सम्पूर्ण राजनीतिक दलहरुले पहिला आफ्ना पार्टीका सदस्यहरुलाई शैक्षिक क्षेत्रमा प्रवेश नगराउने प्रतिबद्धता जनाएमात्र शैक्षिक क्षेत्रको प्रगति हुने बताए । उनले अन्य क्षेत्रमा हुने सहमतिजस्तै शैक्षिक क्षेत्रमा हुने राजनीति अन्त्य गर्न पनि राष्ट्रिय सहमतिमा सम्पूर्ण राजनीतिक दलहरु आउनुपर्ने बताए । ‘अहिलेको अवस्थामा प्रधानमन्त्रीले सम्पूर्ण राजनीतिक दहरुलाई बोलाएर शैक्षिक क्षेत्रमा आफ्नो पार्टीबाट कुनैपनि संलग्नता र हस्तक्षेप हुँदैन, तपाईँहरुको पार्टीबाट हुनुभएन भनेर १२ बुँदे सहमति गरेजस्तै सहमति गर्नुभयो भने शैक्षिक क्षेत्रको प्रगति छिट्टै हुन्छ ।’, प्राज्ञिक केदारभक्त माथेमाले भने ।
त्यस्तै उनले विश्वविद्यालयमा उपकुलपति, शिक्षाध्यक्ष र रजिष्टार मेरिटोक्रेसीका आधारमा नियुक्त गरेकामा धन्यवाद दिँदै माथिको नियुक्तिमात्रै नभएर तल्लो तह (विद्यालय) बाटै शैक्षिक क्षेत्रको सुद्धिकरण गर्न मन्त्री श्रेष्ठलाई आग्रह गरे ।
त्यसको जवाफमा शिक्षामन्त्री श्रेष्ठले आफूहरुले कुनै पनि शिक्षकहरु राजनीतिक दलको सदस्य रहेको थाहा पाएमा निर्मम भएर कारबाही गर्ने बताइन् । ‘हामीले पहिलेदेखि नै भन्दै आएका छौँ, शिक्षकले राजनीतिक दलमा रहेर राजनीति गर्न पाइँदैन । यदि त्यस्तो छ भने हामी निर्मम भएर कानुनअनुसार कारबाही गर्छौँ’,उनले थपिन्, ‘काहीँ त्यस्तो छ भने उजुरी गर्नका लागि हामीले सार्वजनिक आह्वान नै गरिसकेका छौँ । तपाईँहरुले पनि सल्लाह सुझाव दिइरहनुहोला ।’
त्यस्तै मन्त्री श्रेष्ठले आफ्नो तर्फबाट शैक्षिक क्षेत्रहरुमा कुनै दबाब, प्रभाव र हस्तक्षेप नहुने र अन्य राजनीतिक दलहरुलाई पनि हस्तक्षेप नगर्न आग्रह गरिदिन प्राज्ञिकहरुलाई आग्रह गरेकी छिन् ।
त्यस्तै उनले विद्यालयलाई शिक्षा क्षेत्र मात्र नभएर समाजमा चेतना दिने ठाउँको रुपमा हेरेको र त्यस्ले श्रमिक उत्पादन मात्र नभएर सभ्य नागरिक समेत उत्पादनमा भुमिका खेल्ने भएकाले आफूहरुले सोही रुपमा लिएर अघि बढेको बताएकी छिन् । उनले भनिन्, ‘सानोबाट नै बालबालिकाको स्वभाव परिवर्तन गराउनका लागि हामीले केही डिजिटल कार्यक्रमहरु ल्याउने प्रक्रियामा छौँ । त्यसमा तपाईँहरु (प्राज्ञिक) को अमूल्य साथ, सहयोग र सहकार्यको अपेक्षा गरेको छु ।’
