शुक्रबार राति जाजरकोट केन्द्रबिन्दु बनाएर गएको भूकम्पमा परी मृत्यु हुनेको संख्या १ सय ५७ पुगेको छ भने १ सय ६६ जना घाइते भएका छन् ।
प्रहरी प्रधान कार्यालयका अनुसार भूकम्पमा परी जाजरकोटमा मृत्यु हुनेको संख्या १ सय ५ जना पुगेको छ भने रुकुम पश्चिममा ५२ जनाको शव संकलन भएको छ । यस्तै जाजरकोटमा ८१ र रुकुम पश्चिममा ७९, दैलेखमा ३ र जुम्लामा ३ जना घाइते भएका छन् ।
घाइतेहरुलाई अवस्था हेरेर स्वास्थ्य संस्था, जिल्लाका विभिन्न अस्पताल, सुर्खेत, नेपालगन्ज र काठमाडौँका अस्पतालमा समेत ल्याएर उपचार गरिँदै छ ।
त्यस्तै भत्किएका संरचनाभित्र कोही थुनिएको वा पुरिएको छ कि भनेर खोजीकार्य तिब्र बनाएको प्रहरीले जनाएको छ । जसका लागि नेपाल प्रहरी, नेपाली सेना र सशस्त्र प्रहरी बलका टोली परिचालन गरिएको छ।
दुर्गम पहाडी भूभाग, त्यसमाथि भूकम्पका कारण सडक र संचार सेवा अवरुद्ध हुँदा उद्धार कार्यमा समस्या भएको हो । त्यस्तै प्रहरीले उद्धार कार्य लगभग अन्तिम चरणमा पुगेको बताएको छ ।
