धादिङ । माघे सङ्क्रान्तिको अवसरका धादिङको निलकण्ठ–५, फ्याक्सेमा गोरु जुधाई प्रतियोगिता आयोजना गरिँदै छ । स्थानीय युवा क्लव चमेरेगुफा संरक्षण समाजको आयोजनामा हुन लागेको उक्त गोरु जुधाई प्रतियोगितामा ७ हल गोरु दर्ता भएको आयोजक क्षितिज श्रेष्ठले जनकारी दिए । प्रतियोगितामा विजयी हुने गोरुलाई ९ हजार रुपैयाँ नगद पुस्कार तोकिएको छ भने उपविजेता गोरुले पनि ७ हजार ५ सय रुपैयाँ नगद पाउने छ ।
परम्परादेखि नै फ्याक्सेमा माघे सङ्क्रान्तिको दिन गोरु जुधाउने कार्यक्रम हुँदै आएको छ । तर आवश्यक प्रचारप्रसार अभावका कारण खासै चर्चा पाउन सकेन । तर पछिल्लो ९ वर्षदेखि स्थानीय युवा क्लवले प्रतियोगिता नै आयोजना गरेर कार्यक्रम गर्न सुरु गरेको हो ।
‘सदियौँदेखि यहाँ गोरु जुधाउने परम्परा रहँदै आएको छ । तर यो परम्परा यहाँ मात्रै सिमित थियो । विगत ९ वर्षदेखि हामीले परम्परालाई प्रतियोगितामा रुपान्तरण गरी यसलाई सर्वब्यापी बनाउने प्रयास गर्दै आएका छौँ ।’ आयोजक क्षितिज श्रेष्ठले भने । यसबाट संस्कृतिको जगेर्नासँगै पर्यटन प्रवर्धनमा समेत टेवा पुग्ने श्रेष्ठ बताउँछन् ।
पछिल्लो समय कृषिमा बढ्दै गएको आधुनिकिकरणका कारण गोरु जुधाई प्रतियोगिता सञ्चालन गर्न कठिन भएको छ । आयोजक श्रेष्ठका अनुसार अहिले वैदेशिक रोजगारीका कारण विदेशिनेको संख्या बढ्दा गाउँमा खेति गर्ने मानिस कम छन् । त्यसमाथि पनि गोरुलाई ट्याक्टरले प्रतिस्थापन गर्दै गएपछि गोरु पाल्ने कृषकको संख्या कम छ । यसले प्रतियोगिता संचालनमा समस्या हुने गरेको छ । श्रेष्ठ भन्छन्, ‘पहिले गोरु धेरै भएर जुधाउने समय पुग्दैनथ्यो । अहिले त्यो अवस्था छैन । गाउँमा कृषिमा आधुनिकिकरण बढ्नु आफैँमा राम्रो कुरा हो । तर यसले संस्कृति नै लोप हुने हो कि भन्ने चिन्ता बढाएको छ ।’
फ्याक्सेमा गोरु जुधाई प्रतियाेगितासँगै स्थानीय लाखे नाचको मनोरञ्जन लिन सकिने तथा स्थानीय स्तरमा उत्पादन हुने उखु, खुदो र शखरको स्वाद लिन सकिने आयोजकले जनाएका छन् ।
माघे संक्रान्तीका दिन नुवाकोट तारुकाको खानिकौशिनी, रसुवाको बेत्रावती लगायत ठाउँमा पनि गोरु जुधाउने गरिन्छ ।
