काठमाडौँ । दोलखा सदरमुकाम चरिकोटबाट करिव १५ किलो मिटर उत्तर कालिञ्चोक गाविसमा अवस्थित कालिञ्चोक मन्दिर ३८४२ मिटरको उचाइमा छ ।
कालिञ्चोक भगवती काभ्रेको पलाञ्चोक भगवती, काठमाडौंको शोभा भगवती र अन्य भगवती समेत ७ भगवती दिदी बहिनी हुन् भन्ने किम्वदन्ती रहेको छ । कालिञ्चोक डाँडाबाट मनोरम रोलवालिङ हिम शृङ्खला र मनोरम प्राकृतिक दृष्यहरूको अवलोकन गर्न सकिन्छ । जनैपुर्णीमा, दशैँ, चैते दशैँमा भक्तजनको भिड लाग्ने गर्दछ। कालिञ्चोक चरिकोट देखि ६ घण्टाको पैदल दूरीमा छ। यो हिन्दुहरूको लागि एक प्रसिद्ध तीर्थ स्थल हो ।
कालिञ्चोक पर्यटकीय र धार्मिक दुबै दृष्टिकोणले उत्तिकै महत्वपूर्ण छ । कालिञ्चोक भगवतीको दर्शन गर्ने तीर्थयात्रीदेखि हिउँ खेल्न रुचाउने युवाहरू अनि प्रेमका जोडीहरू सबैले रुचाएकाले कालिञ्चोक काठमाडौँबाट नजिकको पर्यटकीय गन्तव्यको सूचीमा आउँछ।
भगवती देवीले आफ्नो इच्छा पुरा गरिदिने विश्वास लिएर भक्तजनहरू टाढाटाढाबाट कालिञ्चोक आउने गर्छन ।
फिल्मकर्मीहरूले पनि यो ठाउँ मन पराएका छन् र थुप्रै चलचित्र र म्युजिक भिडियो पनि यही खिचिने गरिन्छ । कुरी गाँउमा हिउँदमा हिउँ खेल्न आउनेहरुको भिड नै लाग्ने गर्दछ । हिउँद को समयमा कुरिएका होटलहरुलाई भ्याइनभ्याइ हुने गर्छ । जाने हैन त कालिञ्चोक ? तस्विरः मनिष अर्याल, नेपाल फोटो लाइब्रेरी
