काठमाडौँ । पूर्व पश्चिम राजमार्गअन्तर्गत कैलाली र बर्दिया जोड्ने चिसापानीको कर्णाली पुलमा भीषण आगलागी भएको छ।
लाइटर बोकेर पुलमा गुडिरहेको ट्रकमा लागेको आगो पुलको लठ्ठामा समेत सल्किएकाे छ। जिल्ला प्रहरी कार्यालय बर्दियाका प्रमुख एसपी प्रविण धितालकाअनुसार वीरगंजबाट धनगढीका लागि लाइटर बोकेर आएको ट्रकमा आगो लागेको हो ।
लाइटर भरिएको ना ५ ख ५५५७ नम्बरको ट्रकमा अपरान्ह ४ बजेतिर एक्कासी आगो लागेको धितालले बताए । ‘आगलागीका कारण ट्रक जलिरहेको छ र आगो निभाउन गरिएको प्रयास सफल भएको छैन्,’ प्रहरी उपरीक्षक धितालले सिधाकुरासंग भने,‘ लम्कीबाट ल्याइएको दमकलले छ्यापेको पानीले पनि आगो नियन्त्रणमा आउन सकेन । अर्को दमकल मगाइरहेका छौं । ’
उनका अनुसार ट्रक बर्दियाबाट कर्णाली चिसापानी पुलको करिब २५ मिटर भित्र छिरेपछि आगलागीमा परेको हो । ट्रकको आगोको लप्काले पुलको लठ्ठामा लगाइएको प्लाष्टिकको कभरमा जलेको एसपी धितालले बताए ।
