काठमाडाैँ : नेकपा एमालेको कार्यक्रमलाई कोशी प्रदेशमा अवरोध गर्न ओखलढुङ्गा, खोटाङ्गलगायतका जिल्लाहरुमा सडकमा रुख ढाल्ने ८ जना पहिचानवादीलाई प्रहरीले नियन्त्रणमा लिएको छ ।
नेकपा एमालेको संकल्प यात्राका क्रममा एमाले अध्यक्षसहितको टोली कोशीको प्रदेशको यात्रामा छन्् । उनीहरुले दिउँसो १ बजे ओखलढुंगाको हर्कपुरमा उदयपुर, ओखलढुंगा, खोटाङ र सोलुखुम्बुको संयुक्त भेलालाई सम्बोधन गर्दै छन् । त्यसपश्चात उनी खोटाङतर्फको यात्रा तय गर्नेछन् ।
एमालेको यही कार्यक्रमलाई बिथोल्नका लागि पहिचानवादी समूहले विभिन्न स्थानमा अवरोध पुर्याउने ध्येयले सडकमा रुख ढालेर तेर्साएका हुन् । त्यस्तै यस्तै अराजक समूहलाई नियन्त्रणमा लिनका लागि नेपाल प्रहरी, सशस्त्र प्रहरीले गस्ति गरिरहेको र सुरक्षा अवस्था कडा पारिएको छ ।
एमालेको संकल्प यात्रालाई लक्षित गर्दै पहिचानवादी समूहले प्रदेश बन्द समेतको घोषणा गरेका छन् ।
एमालेको उक्त सङ्कल्प यात्रामा अध्यक्ष ओलीका साथै वरिष्ठ उपाध्यक्ष ईश्वर पोखरेल, उपाध्यक्षहरू युवराज ज्ञवाली, अष्टलक्ष्मी शाक्य, रामबहादुर थापा, विष्णुप्रसाद पौडेल र सुरेन्द्र पाण्डे, महासचिव शङ्कर पोखरेल, उपमहासचिवहरु प्रदीपकुमार ज्ञवाली, पृथ्वीसुब्बा गुरुङ, विष्णु रिमाललगायतका नेताहरु छन् ।
