ललितपुर । जावलाखेलका ४१ वर्षीय सजिलमान शाक्य स्क्वायर होटलमा स्वीमिङ गर्न जाँदा करेन्ट लागेर गम्भीर घाइते भएपछि प्रहरीले ललितपुरको पुल्चोकमा रहेको उक्त होटलकी सञ्चालकलाई पक्राउ गरेको छ। जिल्ला प्रहरी परिसर ललितपुरले होटकी संचालक ललिता भण्डारीलाई शनिबार नियन्त्रणमा लिएको हो ।
गत भदौ १५ गते स्वीमिङ गर्न होटल पुगेका सलिजमान स्वीमिङकै क्रममा अचेत भएका थिए । शाक्यको लामो सयम अस्पतालमा उपचार गराएपछि अहिले उनलाई २४ सै घण्टा स्वास्थ्यकर्मीको निगरानीमा घरमै उपचार गरिराखिएको छ ।
उनी घाइते भएपछि परिवारले उक्त होटलका सञ्चालकहरू रोमी अर्याल र ललिता भण्डारीविरूद्ध प्रहरीमा जाहेरी दिएका थिए। सोहीअनुरुप प्रहरीले करिब ५ महिनापछि संचालक ललिता भण्डारीलाई पक्राउ गरेको हो । त्यस्तै ललिताकी सासु रोमी भने अझै पक्राउ परेकी छैनन्।
माघ ७, २०८० १२:२८ मा प्रकाशित
