५ असोज, बाँके । बाँकेको डुडुवा गाउँपालिका ६ स्थित जयेन्दु बालसुधार गृहमा गएराति झडप हुँदा एक जनाको मृत्यु भएको छ ।
झडपका क्रममा अपहरण, शरिर बन्धक र जवरजस्ती करणीको सजाय काटिरहेका कपिलबस्तु रुद्रपुरका करिव २१ वर्षीय सुलभ केसीको मृत्यु भएकाे बाँके प्रहरीले जनाएको छ ।
प्रहरीका अनुसार गएराति साढे १० वजेबाट सुरु भएको झडप बिहान २ वजेसम्म चलेको थियो । झडपमा परि १० जना घाइते भएका छन् । घाइतेको नेपालगन्ज मेडिकल कलेज शिक्षण अस्पतालमा उपचार भैरहेको छ । बाँके प्रहरीका अनुसार ३० जना भन्दा बढी कैदी भागेका छन् ।
राति खाना खानेक्रममा सुरु भएको सामान्य विवादले उग्ररुपमा लिएको प्रहरीको भनाई छ । आक्रोशित कैदीहरुले कार्यालयमा तोडफोड र आगजनी गर्नुका साथै प्रहरीमाथि पनि आक्रमण गरेका थिए ।
सुधार गृहमा रहेका प्रहरीको सरकारी गाडी र एउटा निजी मोटरसाइकलमा समेत क्षति पुर्याएको प्रहरीले जनाएको छ ।
