काठमाडौँ। राष्ट्रिय स्वतन्त्र पार्टी (रास्वपा) का सभापति रवि लामिछानेलाई काठमाडौँमा ७४ प्रश्न सोधिएको छ । काठमाडौँको कालीमाटीमा रहेको स्वर्णलक्ष्मी सहकारीको बचत अपचलनमा अनुसन्धान गर्न बिहिबार काठमाडौँ ल्याइएका उनीसँग शुक्रबार, आइतबार र सोमबार गरि ७४ प्रश्न सोधिएको हो ।
शुक्रबार र आइतबार गरि ६० प्रश्न सोधिएको उनलाई जिल्ला सरकारी वकिलको कार्यालय काठमाडौँमा सोमबार थप १४ प्रश्न सोधिएको हो । ३ दिन गरि ७४ प्रश्न सोधिएको उनको बयान प्रमाणिकरण गर्ने क्रम रहेको कार्यालयका एक अधिकारीले बताए । उनको बयान प्रमाणिकरण गरेर चितवन पठाइने परिसर स्रोतले बतायो ।
लामिछानेलाई सहकारी ठगी आरोपमा अनुसन्धान गर्न कात्तिक २ गते काठमाडौँबाट पक्राउ गरी पोखरा लगिएको थियो । त्यसपछि उनीविरुद्ध संगठित अपराध र सम्पत्ति सुद्धिकरणमा समेत अनुसन्धान भईरहेको छ ।
उनलाई कास्की जिल्ला अदालतले ५ पटक म्याद थप गरिसकेको छ । यो बिचमा उनीविरुद्ध रुपन्देही, चितवन र काठमाडौँबाट पनि पक्राउपुर्जी जारी भएको छ । उनलाई रुपन्देही लगेर बयान गराईसकिएको छ भने अहिले काठमाडौँमा बयानका लागि ल्याइएको छ । लामिछानेलाई काठमाडौँबाट चितवन पठाउने तयारी छ ।
