राष्ट्रिय सभा निर्वाचनमा लुम्बिनी प्रदेशमा सत्ता गठबन्धनका उम्मेदवारको विजयी भएको छ । गठबन्धनका तर्फबाट अन्य क्लस्टरमा नेकपा माओवादी केन्द्रका झक्कुप्रसाद सुवेदी विजयी भएका छन् भने गठबन्धनकै महिला क्लस्टरअन्तर्गत नेपाली कांग्रेसकी विष्णुकुमारी सापकोटा विजयी भएकी छिन् ।
सापकोटाले ५४३५ मत भार प्राप्त गरी विजयी भएकी छिन् भने उनकी प्रतिस्पर्धी नेकपा एमालेकी तुलसा केसीले २८६७ मतभार प्राप्त गरेकी छिन् ।
उक्त प्रदेशमा नेकपा एमालेबाट झपेन्द्रबहादुर घर्ती क्षेत्री, तुलसा कुमारी केसीले उम्मेदवारी दिएका थिए भने राप्रपाबाट विजया लक्ष्मी सिंह र जनमत पार्टीबाट बालगोविन्द चौधरी उम्मेदवारी दर्ता गराएका थिए ।
प्रदेशसभाका ८७ जना सांसद र १०९ स्थानीय तहका प्रमुख र उपप्रमुख गरी २१८ जना मतदाता रहेको प्रदेशमा कुल ३०३ मत खसेको थियो ।
माघ ११, २०८० ०४:४२ मा प्रकाशित
