झापाको नेपाल टेलिकम सुरुङ्गा शाखामा कार्यरत निमित्त कार्यालय प्रमुख दिलिप सुवेदी एक हप्तादेखि बेपत्ता भएका छन् ।
गत शनिवार बिहान कनकाई नगरपालिका ३, सुरुङ्गामा रहेको क्वाटरबाट सम्पर्कविहिन भएका सुवेदी एक हप्तासम्म सम्पर्कमा आएका छैनन् ।
अधिकृत छैठौँ तहका ३१ बर्षीय सुवेदीकी श्रीमती ब्रजुना भट्टराई सुवेदीका अनुसार उनीसँग अन्तिम पटक शनिवार ८ बजेर ४९ मिनेटमा कुराकानी भएको थियो । उक्त समयमा सामान्य कुराकानी भएपनि दिउँसो १२ बजे सम्पर्क गर्दा मोवाईल अफ रहेको उनले बताइन् ।
सुरुमा फोन अफ भएर सम्पर्क नभएको हुनसक्ने आशंकामा बसेका परिवारले साँझ ५ बजेसम्म दिलिप सुवेदी सम्पर्कमा नआएपछि दिलिप कार्यरत टेलिकममा सम्पर्क गरे । तर उनको केही पत्तो लागेन ।
एक हप्तादेखि सम्पर्कविहिन भएका सुवेदीको खोजीकार्यमा निरन्तर लागेपनि फेला नपरेको जिल्ला प्रहरी कार्यालय झापाले बताएको छ ।
इलाका प्रहरी कार्यालय सुरुङ्गाका वरिष्ठ प्रहरी नायव निरिक्षक अशोक कोइरालाका अनुसार सुवेदीले कोठामा चाबी लगाएको र पिएको पानीको ग्लास समेत ओछ्यानमै छोडेका थिए । त्यस्तै उनले मोबाइल बोकेर गएका भए पनि स्कुटरको चाबी, मोबाइल चार्जर र पर्स भने कोठामै छोडेर गएका छन् ।
विराटनगर नगरपालिका – ४ राजवंशी चोकमा स्थायी घर भएका सुवेदी गत फागुन महिनादेखि सुरुङ्गा टेलिकम शाखामा कार्यरत थिए । उनी टेलिकमले उपलब्ध गराएको क्वाटरमा बस्दै आएका थिए । टेलिकमको कार्यालयदेखि उनको कोठा ५ सय मिटर दुरीमा रहेको छ ।
