३१ भदौ -तीनकुने सामूहिक हत्यामा सिन्धुपाल्चोक बाह्रबिसे नगरपालिकाका सञ्जय भण्डारी संलग्न रहेको प्रहरीको प्रारम्भिक अनुसन्धानमा देखिएको छ ।
प्रहरीले काठमाडौंको तीनकुनेस्थित गैह्रीधारामा भएको सामूहिक हत्याका आरोपित सञ्जय भण्डारीलाई सार्वजनिक गरेको हो । खुकुरी प्रहार गरेर हतियारसहित भागेका उनलाई प्रहरीले आइतबार सीसीटीभी फुटेजको आधारमा पक्राउ गरेको हो ।
बोल्न समेत नसक्ने भण्डारीको प्रहरीले दोभासेको सहयोगमा बयान लिएको छ ।प्रहरीका अनुसार ४ जनाको हत्या गरेर उनी भाग्दै दिदीको घर पेप्सीकोला पुगेका थिए ।
गत शुक्रबार राति तीनकुनेको दिव्य सःमिलमा नवीन राईसहित ४ जनाको धारिलो हतियार प्रहारबाट हत्या भएको थियो ।
प्रहरीले घटनाको अनुसन्धानका लागि तीन सदस्यीय छानबिन समिति गठन गरेको थियो । सो समितिले ३७ घण्टाको सक्रियतामा संलग्नलाई पक्राउ गरी सार्वजनिक गरेको हो ।
