काठमाडाैँ । नेपाल विद्युत प्राधिकरणका कार्यकारी निर्देशक कुलमान घिसिङले डिडिकेटेड र ट्रंकलाइनको बक्यौता नबुझाउने उद्योगले १५ दिनभित्र बक्यौता नबुझाए पुनः लाइन काट्ने बताएका छन् । बुधबार प्राधिकरणमा पत्रकार सम्मेलन गर्दै घिसिङले नेपाल सरकारले १५ दिनभित्र बक्यौता उठाउने गरि विद्युत जोड्न निर्देशन दिएपछि आफूहरुले विद्युत जोड्ने बताएका हुन् ।
सम्मेलनमा बोल्दै कार्यकारी निर्देशक घिसिङले आफू नेपाल सरकार मातहत रहेको निकाय भएका कारण आफूहरुले सरकारको निर्देशन मान्ने तर सरकारले दिएको १५ दिनको समयमा बक्यौता बुझाउनुपर्ने उनले बताए । उनले भने, ‘हामीले पछिल्लो पटक समेत गरि ४ औँ पटक लाइन काटेका थियौँ । कात्तिक ८ गते हामीले लाइन काटेका थियौँ । त्यसपछि भर्खरै नेपाल सरकारले एउटा निर्देशन दिएको छ, १५ दिनभित्र बक्यौता उठाउने गरि हालका लागि २४ घण्टाभित्र लाइन तत्काल जोड्ने भन्ने निर्देशन प्राप्त भएको छ । हामी १५ दिनभित्र विद्युतको बक्यौता रकम उठाउन हामी लाग्ने छौँ । उहाँहरुले १५ दिनभित्र नेपाल सरकारको निर्देशन बमोजिम बक्यौता बुझाउनुपर्ने छ ।’
त्यस्तै १५ दिनभित्र सरकारको निर्देशन बमोजिम प्राधिकरणको बिल चुक्ता नगरे आफूहरुले पुनः कारबाहीको प्रक्रिया अघि बढाउने बताए । ‘१५ दिनभित्र हामीले गरेको बिल अनुसारको रकम बुझाएन भने हामी आफ्नो प्रक्रियामा फेरी पनि लाग्ने छौँ ।’, कार्यकारी निर्देशक घिसिङले भने ।
