काठमाडौँमा जारी त्रिकोणात्मक टी–२० सिरिजअन्तर्गत शुक्रबारको खेलमा नेपालले नामिबियाविरुद्ध पहिले ब्याटिङ गर्ने भएको छ । कीर्तिपुरस्थित त्रिवि क्रिकेट मैदानमा नामिबियाले टस जितेर बलिङ रोजेपछि नेपालले पहिले ब्याटिङ गर्ने भएको हो ।
नेपालको प्लेइङ ११ तर्फ आज अनिल शाह, आसिफ शेख, रोहित पौडेल (कप्तान), कुशल मल्ल, प्रतिश जिसी, आरिफ शेख, सोमपाल कामी, करण केसी, अभिनाश बोहरा, गुलशन झा र दीपेन्द्रसिंह ऐरी रहेका छन् भने आजको खेलमा ललित राजवंशी, कुशल भुर्तेल र सन्दीप जोरा बेञ्चमा रहेका छन् ।
नेपाल र नामिबियाबिचको पहिलो खेलमा नेपाललाई २० रनले पराजीत भएको थियो । नामिबियाले दिएको २०७ रनको विजयी लक्ष्य पछ्याएको नेपाल १८६ रनमा अल आउट भएको थियो ।
सिरिजको पहिलो खेलमा नामिबियासँग हारेको नेपालले सिरिजको दोस्रो खेलमा नेदरल्याण्ड्ससँग २ रनले पराजित भएको थियो । दुवै खेलमा पराजित नेपालले फाइनल खेल्ने सम्भावना कायम राख्न आज जित्नैपर्ने दबाबमा छ ।
