वीरगंज । नागरिकता किर्ते गरेको आरोप लागेका वीरगंज महानगरपालिकाका मेयर राजेशमान सिंहलाई फैजदारी अभियोगमा मुद्दा चलाइने भएको छ ।
जिल्ला प्रहरी कार्यालय पर्साका अनुसार मेयरसिंहलाई फाैजदारी अभियाेगमा मुद्दा चलाउने तयारी भएकाे हाे । प्रहरीले जिल्ला सरकारी वकिलकाे कार्यालयसँग राय मागेकाे बताउँदै पर्साका प्रहरी उपरिक्षक कोमल शाहले सिधाकुरासँग भने, ‘हुँदै नभएको छोरीलाई आफ्नो छोरी भनेर नागरिकता दिलाउनु भनेको फौजदारी अभियोगअन्तर्गतको मुद्दा हो । यसै अन्तर्गत मेयरलाई कारबाही प्रक्रिया अगाडि बढाउने तयारी गरेका छौँ ।’
त्यस्तै प्रशासनलाई समेत सरकारी वकिलकाे कार्यालयले मेयरविरद्ध फाैजदारी कसुर आर्कषित हुने राय दिएकाे छ । प्रशासन स्रोतकाअनुसार जिल्ला सरकारी वकिल कार्यालय पर्साले मेयरको किर्ते कार्यका लागि फौजदारी कसुर आर्कषित हुने भन्दै सोहीअनुसार मुद्धा चल्ने राय प्रशासनलाई दिएको छ ।
‘मेयरविरुद्ध कस्तो मुद्धा चल्ने भन्दै प्रशासनले कानुनी राय मागेको छ,’ जिल्ला प्रशासन स्रोतले सिधाकुरासँग भन्यो, ‘फौजदारी कसुरमा मुद्धा चल्ने राय सरकारी वकिलबाट आएको छ ।’
नागरिकता प्रकरण बाहिरिएपछि जिल्ला प्रशासनले गठन गरेको छानबिन समितिको प्रतिवेदन, सञ्चार माध्यमबाट बाहिरिएको प्रमाण लगायतका विषयहरुसहित अन्य प्रमाण संकलनको काम भइरहेको स्रोतले बतायो । जिल्ला प्रशासन स्रोतले भन्यो ‘छिट्टै हामी निश्कर्षमा पुग्छौं ।’
प्रशासनकाअनुसार मेयरको नागरिकता किर्ते लुकाउन भूमीका खेलेका सरकारी कर्मचारीमाथि पनि मुद्धा चलाउने तयारी छ । रुबिना श्रेष्ठ नाम गरेकी किशोरीलाई नक्कली बाबु बनेर नागरिकता दिलाइदिएको खुलासा सिधाकुराले पुस २४ गते गरेको थियो ।
नागरिकता किर्ते गरेको सार्वजनिक भएपछि मेयरविरुद्ध जिल्ला प्रशासन कार्यालय पर्सामा १६ वटा जाहेरी परेको थियो । यस्तै मेयरलाई कारबाही माग गर्दै जिल्ला प्रशासन कार्यालय पर्सामा पनि उजुरी दर्ता भएको थियो ।
मेयरको नागरिकता कीर्तेबारे सबै समाचार पढ्नुहोस् ।
EXCLUSIVE : नागरिकता किर्तेमा वीरगंज महानगरका मेयर राजेशमान सिंह (भिडियोसहित)
नागरिकता किर्तेमा वीरगंजका मेयरविरुद्ध जाहेरी दर्ता
नक्कली बाबु बनेर नागरिकता दिने वीरगंजका मेयर के भन्छन् ? (अडियाेसहित)
वीरगंजका मेयर राजेशमान सिंहविरुद्ध थप १५ जनाले दिए जाहेरी
वीरगंजका मेयर राजेशमान सिंह माथि छानबिन गर्न समिति गठन
वीरगंजका मेयर राजेशमान सिहंविरुद्ध गृह मन्त्रालयमा पनि उजुरी
वीरगंजका मेयर सिंह र पूर्व प्रमुख जिल्ला अधिकारी ढकालसहित ४ जनाविरुद्ध अख्तियारमा उजुरी दर्ता
जिल्ला प्रशासनबाटै नागरिकताको अनुसूची गायब, कर्मचारीमाथि अनुसन्धान सुरु
