पोखराको मित्रमिलन सहकारीको कार्यक्षेत्र विस्तार गर्ने विषयमा घुस लिएको आरोप लागेका सहकारी रजिस्ट्रारको कार्यालय गण्डकीका पूर्व रजिस्ट्रारसमेत रहेका कुश्मा नगरपालिकाका प्रमुख प्रशासकीय अधिकृत उदयबहादुर पराजुली पक्राउ परेका छन् ।
मित्र मिलन सहकारीका अध्यक्ष रमण पौडेल र प्रवन्धक किरण अधिकारीको बयानका आधारमा उनको नाममा पुस ५ गते पक्राउ पुर्जी जारी भएको थियो । उनले सहकारीको कार्यक्षेत्र विस्तार गर्न १ करोड २५ लाख रूपैयाँ घुस लिएको आरोप लागेको छ ।
आरोपित पराजुलीलाई कास्की प्रहरीले पक्राउ गर्न पर्वत प्रहरीलाई आग्रह गरेको थियो । सोहीअनुरुप पर्वत प्रहरीले बुधबार उनलाई कार्यकक्षबाट नै पक्राउ गरेको हो । उनलाई बुधबारनै कास्की पठाउने तयारी भइरहेको छ ।
गत कात्तिक ४ पक्राउ परेका सहकारीका अध्यक्ष पौडेल र प्रबन्धक अधिकारीले स्याङ्जामा कार्यक्षेत्र विस्तार गर्न रजिस्ट्रारलाई एक करोड २५ लाख रुपैयाँ घुस दिएको बयान दिएका थिए ।उनीहरु दुवैजना बैंकिङ कसुरमा प्रक्राउ परेका थिए ।
