काठमाडाैँ । ओमानमा जारी एसीसी प्रिमियर कप २०२४ मा नेपालले साउदी अरेबियालाई ६ विकेटले हराएको छ । ओमानको अल अमेरत खेल मैदानमा भएको खेलमा नेपालले ७.२ ओभरमा ४ विकेट गुमाउँदै निर्धारिध लक्ष्य भेट्याएको हो ।
वर्षाले प्रभावित भएपछि २० ओभरबाट आठ ओभरमा झारिएको खेलमा टस हारेर पहिले ब्याटिङ गरेको साउदी अरेबियाले निर्धारित आठ ओभरमा सात विकेटको क्षतिमा ७३ रन बनाएको थियो । उक्त लक्ष्य नेपालले ७.२ ओभरमा ४ विकेट गुमाउँदै पूरा गरेको हो ।
नेपालका लागि गुल्सन झाले नटआउट सर्वाधिक ३२ रन र कप्तान रोहितकुमार पौडेलले १६ रन बनाएका हुन् ।
समूह ‘ए’मा रहेको नेपालले यसअघिका तीन वटै खेलमा जित हात पारेको थियो । नेपालले पहिलो खेलमा मलेसियालाई पाँच विकेट, दोस्रो खेलमा कतारलाई ३२ रन र तेस्रो खेलमा हङकङलाई आठ विकेटले पराजित गरेको थियो ।
नेपालले चाैथाे खेलमा साउदीसँग जीत हात पारेसँगै समूह ए बाट सबै खेलमा जित हात पार्दै नेपाल सेमिफाइनलमा पुगेको छ । नेपालले शुक्रबार समूह बी को उपविजेतासँग सेमीफाइनल खेल्नेछ ।
